1 וַיְהִי כְּהַעֲלוֹת יְהוָה אֶת אֵלִיָּהוּ בַּסְּעָרָה הַשָּׁמָיִם, וַיֵּלֶךְ אֵלִיָּהוּ וֶאֱלִישָׁע מִן הַגִּלְגָּל. 2 וַיֹּאמֶר אֵלִיָּהוּ אֶל אֱלִישָׁע: "שֵׁב נָא פֹּה, כִּי יְהוָה שְׁלָחַנִי עַד בֵּית־אֵל". וַיֹּאמֶר אֱלִישָׁע: "חַי־יְהוָה וְחֵי נַפְשְׁךָ, אִם אֶעֶזְבֶךָּ". וַיֵּרְדוּ בֵּית־אֵלָה. 3 וַיֵּצְאוּ בְּנֵי הַנְּבִיאִים אֲשֶׁר בְּבֵית־אֵל אֶל אֱלִישָׁע, וַיֹּאמְרוּ אֵלָיו: "הֲיָדַעְתָּ כִּי הַיּוֹם לֹקֵחַ יְהוָה אֶת אֲדֹנֶיךָ מֵעַל רֹאשֶׁךָ?" וַיֹּאמֶר: "גַּם אֲנִי יָדַעְתִּי – הֶחֱשׁוּ". 4 וַיֹּאמֶר אֵלָיו אֵלִיָּהוּ: "אֱלִישָׁע, שֵׁב נָא פֹּה, כִּי יְהוָה שְׁלָחַנִי יְרִיחוֹ." וַיֹּאמֶר: "חַי־יְהוָה וְחֵי נַפְשְׁךָ, אִם אֶעֶזְבֶךָּ". וַיָּבֹאוּ יְרִיחוֹ. 5 וַיִּגְּשׁוּ בְּנֵי הַנְּבִיאִים אֲשֶׁר בִּירִיחוֹ אֶל אֱלִישָׁע, וַיֹּאמְרוּ אֵלָיו: "הֲיָדַעְתָּ כִּי הַיּוֹם לֹקֵחַ יְהוָה אֶת אֲדֹנֶיךָ מֵעַל רֹאשֶׁךָ?" וַיֹּאמֶר: "גַּם אֲנִי יָדַעְתִּי – הֶחֱשׁוּ". 6 וַיֹּאמֶר לוֹ אֵלִיָּהוּ: "שֵׁב נָא פֹּה, כִּי יְהוָה שְׁלָחַנִי הַיַּרְדֵּנָה". וַיֹּאמֶר: "חַי־יְהוָה וְחֵי נַפְשְׁךָ, אִם אֶעֶזְבֶךָּ". וַיֵּלְכוּ שְׁנֵיהֶם יַחְדָּו.
